Ministri i Drejtësisë është shprehur kundër përdorimit të të ashtuquajturit “kafaz” në sallat e gjykimeve, duke theksuar se standardet europiane kërkojnë balancë mes sigurisë dhe respektimit të të drejtave të njeriut.
Toni Gogu tha sot se debati mbi organizimin e sigurisë në sallat e gjyqit duhet trajtuar me maturi dhe seriozitet, pasi bëhet fjalë për një çështje që prek jo vetëm rendin dhe sigurinë, por edhe dinjitetin njerëzor dhe prezumimin e pafajësisë.
“Standardi europian kërkon një ekuilibër të kujdesshëm midis sigurisë së procesit, dinjitetit njerëzor, prezumimit të pafajësisë dhe mbrojtjes së rendit në sallën e gjyqit”, u shpreh ai.
Sipas ministrit, gjykatat që trajtojnë krimin e organizuar apo çështje me rrezikshmëri të lartë kanë nevoja reale për masa sigurie, por këto masa duhet të jenë proporcionale dhe në përputhje me standardet e të drejtave të njeriut.
“Europa nuk kërkon dobësim të sigurisë. Kërkon profesionalizëm në administrimin e saj”, deklaroi Gogu, duke shtuar se Shqipëria duhet të ecë drejt një drejtësie serioze, moderne dhe europiane, larg “spektaklit procedural”.