Ministri i Mbrojtjes, Piro Vengu, sot në 15 janar iu bëri thirrje të rinjve dhe të rejave të Shqipërisë të konsiderojnë një rrugë karriere të jashtëzakonshme duke u bashkuar me Forcat e Armatosura të vendit. Ai nënvizon se mbetet vetëm pak më shumë se 24 orë për të aplikuar në thirrjen e re të Qendrës së Rekrutimit, duke theksuar rëndësinë e shfrytëzimit të këtij afati.
“Zgjedhja për të shërbyer në Forcat e Armatosura nuk është vetëm një karrierë premtuese, por edhe një eksperiencë që formon karakterin dhe aftësitë tuaja. Përveç trajnimeve fizike dhe profesionale, kjo rrugë ofron mundësinë për të kontribuar direkt në sigurinë dhe mbrojtjen e vendit”,deklaron ministri Vengu.
Stërvitja bazë për kandidatët e pranuar do të zhvillohet nga data 9 shkurt deri më 17 prill 2026. Programi përfshin trajnim fizik dhe taktik, zhvillim aftësish profesionale, si dhe njohuri të thelluara mbi strukturën dhe funksionimin e Forcave të Armatosura. Pjesëmarrja në këtë trajnim është një hap i rëndësishëm drejt një karriere të qëndrueshme dhe të respektuar.
Të rinjtë dhe të rejat që dëshirojnë të aplikojnë mund të kontaktojnë për informacion shtesë në numrin e telefonit 00355 4 234 8588 ose përmes WhatsApp në +355 68 340 4896. Ministri Vengu i fton të gjithë të mos humbasin këtë mundësi unike për t’u bërë pjesë e një force të fuqishme dhe për të kontribuar në mbrojtjen e vendit.
“Shërbimi në Forcat e Armatosura është më shumë se një punë, është një mision dhe një mundësi për t’u rritur personalisht dhe profesionalisht”, përfundon ministri.
Afati i fundit për aplikim është 16 janar 2026.