Ministrja e Infrastrukturës dhe Energjitikës Belinda Balluku, ka vizituar këtë të martë ujësjellësin e ri të Belshit. E shoqëruar dhe nga kryetari i Bashkisë Belsh, Balluku inspektoi stacionin e ri që u mundëson qytetarëve të kësaj zone furnizimin me ujë të pijshëm. Po ashtu ministri Balluku pohoi se qeveria do të garantojë jo vetëm cilësi në shërbim por edhe transparencë, duke shtuar se do të vendosen ujëmatës të rinj tek të gjithë abonentët.
“Këtu është ndërtuar rrjeti në 1986 dhe duhet t’i ofronte shërbim 33 mijë banorëve dhe ndërkohë qeveria shqiptare tashmë prej kohësh investon për të pasur ujë 24 orë, kushtet sanitare dhe higjienike të ujit të pijshëm dhe për të arritur standardin që në këtë rast 180 litra për sekondë në ditë. Pompat e ujit duan energji dhe ne kemi nisur disa projekte pilot me 3 faza, ku e treta ka të bëjë me panelet diellore.
Kemi ujëmatësit e rinj që do të vendosen tek të gjithë abonentët për të mos pasur asnjë konfuzion sa i përket konsumit të tyre real, që tashmë do të kontrollohet i plotë. Kështuqë duke ofruar të gjithë shërbimin me kushtet e duhura do të kemi mundësi që të kuptojnë në kohë reale konsumin ujor apo mujor të ujit. Pra jo vetëm cilësi shërbimi por edhe transparencë.
Qeveria në formulën e re të agregimit të 61 ndërmarrjeve tashmë ka një rol kryesor te vendimarrja pasi ka 50% të aksioneve. Dhe duke pasur këtë lloj instrumenti tashmë qeveria do të vazhdojë të kontribuojë dhe do të jetë kontributori kryesor në fushën e ujësjellësit dhe kanalizimeve. Do të ketë mundësi që në ndërmarrjet e tjera që janë pjesë e këtij agregimi, pra të Elbasanit të aplikojnë të njëjtën skemë që ka bërë Belshi përsa i përket energjisë elektrike, pra efiçensës“,-tha ministrja.