Në Shqipëri do të ketë institucione të arsimit të lartë të pavarura. Lajmin e dha ministrja e Arsimit Evis Kushi, pas mbledhjes së qeverisë. Vendimi i sotëm sipas saj plotëson statusin e institucionit të arsimit të lartë në Shqipëri dhe rrit cilësinë e arsimit. Po ashtu Kushi u bëri thirrje studentëve të aplikojnë për bursa studimi në bazë të 3 kritereve të vendosura.
“Morëm një vendim që plotëson kuadrin ligjor të arsimit të lartë për statusin e institucionit të arsimit të lartë në Shqipëri. Do të kemi dhe një formë të re që janë institucionet e arsimit të lartë publike të pavarura. Kemi përcaktuar të gjitha kriteret, procedurat e dokumentacionin për të krijuar një institucion të ri, por edhe të gjitha procedurat për të transformuar një institucion të arsimit të lartë ekzistues në publik i pavarur.
Ky vendim jo vetëm përmbush kuadrin ligjor, por është në përputhje me strategjinë kombëtare të arsimit dhe u jep fleksibilitet për menaxhimin financiar për mësimdhënien dhe kërkimin shkencor. Këto institucione nuk do të kenë qëllim fitimin dhe të gjitha të ardhurat do të përdoren për të përmbushur misionin e institucionit të arsimit të lartë. E kemi konsultuar edhe me përvojat në vende te tjera për të rritur cilësinë e arsimit të lartë”.