Ministja e Punëve të Jashtme të Gjermanisë, Annalena Baerbock ka deklaruar se Shqipëria dhe Maqedonia e Veriut duhet t’i fillojnë negociatat për anëtarësim në BE në gjysmën e parë të vitit 2022.
“Vende si Ukraina, si edhe shtetet e tjera, prej kohësh e shohin të ardhmen e tyre në BE. Jo vetëm se nuk duhet t’i dëshpërojmë këto vende, por edhe duhet ta mbajmë premtimin për anëtarësim në Bashkimin Evropian. Kjo vlen edhe për disa vende të Ballkanit Perëndimor, para së gjithash për Shqipërinë dhe Maqedoninë e Veriut dhe pikërisht tani në gjysmën e parë të vitit duhet që përfundimisht t’i fillojmë negociatat me Tiranën dhe Shkupin”, u shpreh Baerbock pas takimit të ministrave të Punëve të Jashtme të BE-së në Luksemburg.
Ministrja gjermane tha se hapja e negociatave me të dyja vendet duhet të ishte bërë prej kohësh dhe se ky është një hap i vonuar.
Gjithashtu, Baerbock nënvizoi faktin se ka zhvilluar një bisedë me ministren bullgare të Punëve të Jashtme, Teodora Gençovska, ku kanë rënë dakord se në situatën aktuale është e rëndësishme të fillojnë negociatat për hyrjen e Shqipërisë dhe Maqedonisë së Veriut në Bashkimin Europian.
Ndër të tjera, Baerbock i dërgoi një mesazh edhe autoriteteve serbe, të cilave i’u tha se nëse Beogradi do të bëhet pjesë e unionit, atëherë duhet t’i mbështesin politikat e BE-së, duke përfshirë këtu edhe sanksionet ndaj Rusisë.
“E njëjta vlen edhe për vendet e tjera të Ballkanit Perëndimor, të cilat këto javë e bënë të qartë se shumica prej tyre të ardhmen dhe sigurinë e tyre e shohin në BE. Prandaj ata i mbështesin sanksionet evropiane. Nëse dikush pretendon të bëhet anëtar i Bashkimit Evropian, diçka që edhe Serbia e dëshiron, atëherë mbështetja për politikën e jashtme të BE-së dhe mbështetja për sanksionet është shumë e rëndësishme”, deklaroi Baerbock.