Ministria e Shëndetësisë dhe Mirëqenies Sociale ka propozuar zgjerimin e programit kombëtar të Check-Up, duke hequr kufizimin e sipërm të moshës për kontrollin bazë shëndetësor falas. Nëse miratohet nga Këshilli i Ministrave, duke nisur nga muaji shtator, shërbimi do të jetë i aksesueshëm për të gjithë qytetarët mbi 35 vjeç.
Nisma u prezantua nga ministrja e Shëndetësisë dhe Mirëqenies Sociale, Evis Sala, gjatë një takimi me të moshuarit në Qendrën Sociale Ditore në Pogradec.
“Kemi propozuar pranë Këshillit të Ministrave heqjen e kufizimit të sipërm të moshës për kryerjen e Check-Up falas. Deri më sot, shërbimi ofrohej për grupmoshën 35-70 vjeç. Çdo qytetar mbi 35 vjeç, pavarësisht moshës, do të mund ta kryejë Check-Up falas. Kjo do të thotë se edhe qytetarët 70, 80 apo 90 vjeç do të kenë të njëjtën mundësi për të kryer kontrollet parandaluese, sepse kujdesi për shëndetin nuk ka kufi moshe”, deklaroi ministrja.
Sala bëri të ditur gjithashtu se po punohet për ngritjen, për herë të parë, të shërbimit të Geriatrisë në Shqipëri, i cili fillimisht do të ofrohet në Qendrën Spitalore Universitare “Nënë Tereza”, për t’u shtrirë më pas edhe në rajone të tjera të vendit.
Gjatë takimit, ministrja njoftoi edhe nisjen e kontrolleve administrative në spitalet e vendit për të garantuar respektimin e orarit të punës nga personeli shëndetësor.
Një tjetër risi është krijimi i Linjës së parë të Këshillimit për të Moshuarit, një shërbim falas për informim, orientim dhe mbështetje në aksesin ndaj shërbimeve shëndetësore, sociale dhe publike.
“Për herë të parë po krijojmë një linjë të dedikuar këshillimi për të moshuarit, ku ata do të mund të marrin informacion, orientim dhe mbështetje për çdo shërbim shëndetësor, apo social për të cilin kanë nevojë. Synimi ynë është që asnjë i moshuar të mos mbetet pa informacion dhe pa akses në shërbimet publike”, u shpreh ministrja.
Linja e Këshillimit për të Moshuarit do të jetë e aksesueshme falas në numrin 08004042.