Ministrat e Jashtëm të Ballkanit Perëndimor miratuan këtë të premte tre marrëveshje të rëndësishme rajonale, për lirinë e lëvizjes me karta identiteti, për njohjen e kualifikimeve të arsimit të lartë dhe për njohjen e kualifikimeve profesionale për doktorët e mjekësisë, stomatologët dhe arkitektët – në Ballkanin Perëndimor.
Drejtuesja e Këshillit të Bashkëpunimit Rajonal, Majlinda Bregu, në fjalën e saj në këtë takim, i cilësoi këto marrëveshje jetike për qytetarët e Ballkanit Perëndimor, ndërsa falënderoi gjithë ekipet që janë përfshirë në këtë përpjekje gati 2-vjeçare.
“Lëvizja me karta identiteti në Ballkanin Perëndimor është marrëveshja më e rëndësishme që u krye sot. Na u deshën vërtet gati dy vjet negociata intensive për të marrë versionin konsensual, sot. Por ku ka dëshirë ka dhe mënyrë. Kjo marrëveshje shemb murin e fundit të vizave të mbetura në rajon. E di, regjimi pa viza në rajon nuk është njësoj si regjim pa viza me BE-në. Por në terma realë ky është tregues i një rajoni, një tregu”, tha Bregu.
Të tre marrëveshjet pritet të nënshkruhen në Samitin e drejtuesve të Procesit të Berlinit, i cili do të mbahet në 3 nëntor në kryeqytetin gjerman.