Po bëhen gati dy javë që nga gjetja e një jahti të braktisur 11 milje larg Shëngjinit dhe akoma nuk ka asnjë informacion për kapitenin Sezgin Yavuz.
33-vjeçari dyshohet të ketë qenë në drejtimin e mjetit lundrues “Atik Bey” por në rrethana misterioze është zhdukur, ndërsa jahti u gjet me motor të fikur.
Prokuroria e Lezhës gjatë kësaj kohe ka punuar në mbledhjen e informacioneve të nevojshme ndërkohë që pritet që organi i akuzës t’i drejtohet autoriteteve të drejtësisë Turke dhe atyre Malazeze, për të marrë informacion lidhur me kapitenin Sezgin Yavuz dhe pronarin e jahtit luksoz, Nedim Akyuz.
Por ndërsa autoritet shqiptare vijojnë hetimet, biznesmeni Nedim Akyuz, kërkon që jahti të dërgohet në portet e Greqisë, pasi sipas tij, qëndrimi në portin e Shëngjinit sjell dëmtimin e mjetit lundrues.
Aktualisht ka tre pista hetimi. E para ka të bëjë me ndonjë aksident të mundshëm që mund t’i ketë ndodhur kapitenit të jahtit.
Ndërkohë që dyshime ka se ai mund të jetë ekzekutuar me urdhër nga pronari i mjetit lundrues ose për shkak të përfshirjes së tij në trafikun e lëndëve narkotike.