Mario Mitaj ka hyrë në historinë e futbollit shqiptar, duke u bërë këtë javë lojtari më i ri në moshë që debuton me fanellën kuqezi në ndeshje zyrtare të ekipit A. Prania e tij për pak minuta në sfidën kundër San Marinos e bëri atë rekordmenin e ri me 17 vite e 237 ditë.
Një rekord që ka tërhequr vëmendjen edhe në Greqi, ku mediat e ndryshme kanë shkruar se si djaloshi shqiptar tashmë mban një tjetër shifër mbresëlënëse në CV-në e tij pas asaj që regjistroi me AEK-un duke u bërë i huaji më i ri që vishte fanellën me ekipin e parë të kësaj skuadre dhe i katërti në histori duke llogaritur edhe futbollistët grekë.
Por në mediat greke i është dhënë theks i veçantë edhe faktit se si tashmë Mitaj kishte vendosur përfundimisht që të vishte fanellën kuqezi dhe se FSHF ishte siguruar që të mos kishte kthim prapa. Prej kohësh Mitaj po ndiet me interes edhe nga Federata greke dhe për më tepër, klubi I AEK kishte shtyrë atë që të përfaqësonte helenet. Por me aktivizimin qoftë edhe për pak minuta në ndeshjen zyrtare ndaj San Marinos, tashmë është e qartë se Mitaj nuk mund të luajë me asnjë përfaqësuese tjetër e kështu, Greqia duhet të tërhiqet nga çdo pretendim apo interes që kishte për lojtarin.