Paraditen e sotme, 11 fëmijë shqiptarë morën statusin “Fëmijë në përkujdesje të Republikës” e cila i’u dha nga vetë kryeministri Rama. Ndërkohë, mes atyre që e përfituan këtë status ishte edhe djali i mjekut të urgjencës së Korçës, Kujtim Shabani i cili nuk mundi t’i mbijetonte betejës me koronavirusin.
E pranishme në ceremoninë e sotme në ambientet e kryeministrisë, bashkëshortja e tij tregoi mes lotësh fjalët e fundit që kishte thënë ai para se të jepte shpirt. Sipas saj, mjeku në momentet e tij të fundit ka thënë se në jetë nuk kanë aq shumë rëndësi sa janë vitet që jeton, por mënyra sesi i jeton.
“Ju falenderoj pa masë për gjithë mbështetjen. Jam bashkëshortja e Kujtimit dhe bashkëudhëtarja e tij që në moshën 15 -vjeç kur jemi njohur në bankat e shkollës. Ai kishte një ëndërr që e ktheu në qëllim. Ai nuk hoqi dorë në asnjë moment. Ëndrrën e pati jo vetëm në emër të tij por edhe komunitetit, se pavarësisht nga vjen ti mund t’ia dalësh. I vetmi mësim që ua mësuam fëmijëve, që ta kenë busull në jetë që t’i thonë vetes “ti mundesh”. Sot ai nuk është por unë kam fjalën e tij të fundit: në jetë nuk të bëjnë vitet sesa, por mënyra se si. Kujtimi iku i plotësuar, pavarësisht se iku shumë i ri”, tha ajo.