Edhe pse kanë kaluar 22 vite nga vdekja e saj tragjike, aksidenti i Lady Diana do të përbëjë gjithmonë lajm. Këtë herë ka folur mjeku ligjor që kqyri trupin Dianës pas aksidentit, i cili ka thënë se nëse do të kishte rripin e sigurimit, ndoshta dhe mund të kishte mbijetuar.
“Nëse Lady D do të kishte vendosur rripin e sigurimit, ndoshta mund të kishte mbijetuar. Plaga e saj ishte e vogël, por e rrallë”, ka thënë Richard Shepherd, mjeku ligjor që u mor me hetimin e shkakut të vdekjes së Princeshës. Diana humbi jetën në moshën 36-vjeçare, më 31 gusht 1997, në Pont de l’Alma, e shoqëruar nga Dodi Al-Fayed dhe shoferi Henri Paul.
Vetëm 22 vite pas aksidentit mjeku ka vendosur të zbulojë gjithçka në një libër, të titulluar “Unnatural Causes”. “Nëse do të kishte vendosur rripin e sigurimit, Diana do të shfaqej në publik pak ditë më pas, ndoshta me fytyrë të enjtur, por do të kishte mbijetuar”, ka shkruar mjeku.
“Por, plaga që kishte Lady Diana ishte një nga më të rrallat, për të mos thënë më e rralla, që kam mundur të njoh gjatë gjithë karrierës sime. Ishte një plagë e vogël, por në pikën e gabuar”, ka shtuar mjeku.
Vdekja e Princeshës së Uellsit, ka nxjerë teori të ndryshme, madje dhe konspirative. Për shembull, rezulton që Diana nuk u transportua menjëherë me ambulancë, dhe sot mjeku shpjegon përse: “Pas aksidentit ishte mjaft koshiente. Por përplasja kishte provokuar dëmtimin e një vene të mushkërisë, duke shkaktuar hemoragji të brendshme, që në fund rezultoi fatale.Ndërhyrja kirurgjikale në urgjencën e spitalit nuk shërbeu për ta shpëtuar”.