Mjeku Kita Sallabanda thotë se duhet të jemi të shqetësuar për virusin e lisë së majmunit, edhe pse transmetueshmëria është më e ulët se e COVID, për shkak se përhapet vetëm nëpërmjet kontakteve.
Në një intervistë për “Euronews Albania”, Sallabanda u shpreh se shtetet në botë nuk e mendonin se ky virus do të shfaqej sërish pas shumë vitesh dhe nuk kanë marrë masat e nevojshme.
“Duhet të shqetësohemi. Historia e lisë së majmunëve është e re në Evropë. Rastet e fundit kanë qenë në vitet 1958-1960 dhe nuk kemi pasur të dhëna për virusin e majmunit dhe kjo ka bërë që të mos merren masa ndaj kësaj sëmundjeje. Ka vetëm një laborator që prodhon vaksina për këtë virus, në një numër jo shumë masiv nëse e krahasojmë me COVID.
Transmetueshmëria është më e ulët sepse është vetëm nëpërmjet kontaktit, por përse jemi shqetësuar? Sepse nuk kemi masa mbrojtëse. Të gjitha vendet kanë menduar se ky virus nuk do shfaqej më në botë dhe nuk kanë marrë masa mbrojtëse ndaj këtij virusi. Numri i vaksinave që po marrin vende të ndryshme janë në shifra të ulëta”, theksoi Sallabanda.
Përhapja e lisë së majmunëve është shpallur një emergjencë globale shëndetësore nga Organizata Botërore e Shëndetësisë. Klasifikimi është alarmi më i lartë që mund të lëshojë OBSH-ja dhe pason një rritje të rasteve në mbarë botën.