Një operacion shpëtimi është zhvilluar në orët e para të mëngjesit të kësaj të premteje në brigjet e Vlorës, ku 11 emigrantë u nxorën të sigurt nga deti pasi mjeti lundrues me të cilin udhëtonin rrezikonte të fundosej.
Policia Kufitare bëri të ditur se mori njoftim për një mjet të vogël lundrues në vështirësi, rreth tetë milje larg grykëderdhjes së lumit Vjosë. Menjëherë drejt zonës u nisën dy mjete lundruese tip gomone të Policisë Kufitare, të cilat lokalizuan mjetin dhe realizuan shpëtimin e të gjithë personave që ndodheshin në bord.
Emigrantët u transportuan në tokë dhe aktualisht ndodhen në ambientet e Drejtorisë Vendore të Policisë Vlorë, ku po kryhen procedurat përkatëse.
Sipas të dhënave paraprake, në grup ndodheshin:
- 5 shtetas nga Bangladeshi;
- 3 shtetas nga Pakistani;
- 1 shtetas nga Haiti;
- 1 shtetas nga Afganistani;
- 1 shtetas nga Liberia.
Deri në këtë fazë të hetimeve nuk është përcaktuar ende destinacioni i tyre dhe as nëse synonin të kalonin drejt Italisë me mjetin e vogël lundrues. Kjo pritet të sqarohet pas marrjes në pyetje të emigrantëve dhe përfundimit të veprimeve hetimore nga autoritetet kompetente.