Autoritetet e instaluara nga Moska në Krime kanë shpallur gjendjen e jashtëzakonshme rajonale, ndërsa gadishulli po përballet me pasojat e sulmeve ajrore gjithnjë e më të shpeshta nga Ukraina.
Guvernatori i emëruar nga Rusia, Sergey Aksyonov, bëri të ditur se kjo masë synon të mundësojë një reagim më të shpejtë ndaj situatës dhe të garantojë funksionimin e sektorëve kryesorë.
Sipas tij, Krimea po përballet me mungesa karburanti dhe ndërprerje të energjisë elektrike, si pasojë e sulmeve ukrainase ndaj infrastrukturës në jug të Rusisë, prej nga furnizohet gadishulli.
“Nuk mund të them saktësisht sa kohë do të zgjasë kjo situatë dhe as të bëj publik planin e veprimit, por po marrim masa”, deklaroi Aksyonov.
Ai pranoi gjithashtu se sistemet ruse të mbrojtjes ajrore nuk janë në gjendje të garantojnë mbrojtje të plotë ndaj sulmeve.
Nga ana tjetër, Ukraina i konsideron goditjet ndaj objektivave në Krime dhe infrastrukturës energjetike ruse si kundërpërgjigje ndaj bombardimeve të vazhdueshme ruse mbi civilët dhe rrjetin energjetik ukrainas.
Rusia e aneksoi Krimenë në vitin 2014, por ky veprim nuk njihet nga shumica e vendeve të botës. Kievi vazhdon ta konsiderojë gadishullin pjesë të pandashme të territorit të Ukrainës dhe ka deklaruar se nuk do të heqë dorë nga sovraniteti mbi të.