Tek Tirana e kanë kaluar lehtë barazimin në derbi. Ata vinin nga dy fitore radhazi dhe ajo pikë e marrë përballë Partizanit në një ndeshje aq delikate si ç’është derbi nuk është për t’u nënvlerësuar. Aktualisht kryeqytetasit qëndrojnë të qetë në krye, të bindur se fati i titullit është vetëm në dorën e tyre. Megjithatë, garancia për këtë objektiv do të shihet në tre sfidat e radhës të bardhebluve.
Provën e parë të vështirë e kanë këtë javë teksa udhëtojnë në transfertë përballë Vllaznisë. Shkodranët janë një rival shumë cilësorë, për më tepër në Loro Boriçi. Në dy përballjet e para sezonale, Tirana ka arritur ti marrë katër pikë.
Më pas, bardheblutë presin Dinamon, një rival që i eliminojë nga kupa ndërsa në kampionat kanë arritur ti marrin 6 pikë të plotë. Diskutimi është ndryshe pasi blutë tashmë luftojnë për mbijetesë. Përballja e tretë post Partizanit, i rezervon Tiranës ekipin e Kukësit, një nga tre ekipet e vetme që i ka mposhtur bardhëblutë gjatë këtij sezoni.