Sekretari amerikan Antony Blinken ka zbarkuar sot në Moldavi ku ka zhvilluar takime me krerët me të lartë të vendit, kryeministren Natalia Gavrilita dhe presidenten Maia Sandu. Kjo vizitë vjen si pasojë e një rreziku që vjen nga rusët të cilët mund të synojnë të pushtojnë këtë vend. Blinken është sekretari i tretë i shtetit i SHBA që viziton Moldavinë.
Gjatë vizitës së tij, sekretari Blinken bëri thirrje për unitet, por moldavët duan garanci të forta për sigurinë e tyre. Kujtojmë që javën e kaluar, vetëm disa ditë pas pushtimit të Rusisë, Moldavia aplikoi për anëtarësim në Bashkimin Europian.
“Ju e keni parë përgjigjen globale që ne kemi mobilizuar kundër agresionit të Rusisë, kurdo dhe kudo që mund të shfaqet ai agresion, ne do të bëjmë të njëjtën gjë” tha Blinken.
Ai deklaroi gjithashtu se do të kërkonte fonde për të ndihmuar Moldavinë të kujdeset për refugjatët ukrainas që ka pranuar. Vendi aktualisht po përpiqet të përballojë fluksin e njerzve që po ikin nga lufta dhe kanë gjetur strehë në këtë shtet. Moldavia është një nga vendet më të varfra dhe më të vogla në Evropë.