Prokurorja Doloreza Musabelliu, e cila kandidon për kreun e SPAK-ut, prezantoi platformën e saj para anëtarëve të KLP-së. Pas kësaj ajo u pyet nga anëtarët e Këshillit se cili është prioriteti i saj bazë nëse zgjidhet si drejtuese e institucionit. Musabelliu tha se do të jetë korrupsioni i zyrtarëve të lartë shoqëruar me hetim financiar.
“Baza për mua do jetë korrupsioni për mua në radhët e zyrtarëve të lartë i shoqëruar gjithmonë me hetimin financiar pasuror. Nëse lufton korrupsionin pa konfiskime mendoj se nuk kemi arritur sukses në këtë luftë”, tha ajo.
Ajo u pyet edhe në lidhje me karakteristikat që vlerëson nga drejtuesit e kaluar të SPAK, Arben Kraja dhe Altin Dumani.
“Të dy drejtuesit kanë pasur një komunikim efektiv me prokurorët dhe stafin për ti nxitur të ecin sa më para me dosjet”, tha Musabelliu.
“Në kohën e zotit Dumani pati shumë çështje që ishin pjekur në kohë. Prandaj thashë efekti në kohë. Çështja mund të dojë tre vjet për të krijuar kushtet, të konkludosh, të mbledhësh provat dhe të shkosh drejt kualifikimit të veprës penale. Në kohën e Dumanit pati çështje që evoluan shumë dhe pati guximin ti çonte përpara këto dosje”, tha ajo.
Musabelliu u shpreh se nëse do të jetë drejtuese, do të jetë një njeri i pavarur dhe se presioneve ka mësuar t’i bëjë ballë.