Këtë të mërkurë, në Bruksel ambasadorët e vendeve anëtare të BE-së janë pajtuar të për t’i dhënë mandatin Këshillit Europian që të negociojë procesin e liberalizimit të vizave për Kosovën me Parlamentin Evropian. Pas këtij vendimi, reagime të shumta kanë ardhur në rrjete sociale nga ndërkombëtarët që kanë përshëndetur vendimin.
Thomas Waitz, deputet në Parlamentin Europian, e ka quajtur lajm të mirë vendimin për negocimin e procesit për heqjen e vizave. “Më në fund këshilli ka rënë dakord që të fillojnë negociatat për Liberalizimin e Vizave për Kosovën. Ky është vërtet një lajm i madh! Shpresojmë se do të ndodhë pa asnjë vonesë”.
Kurse zëdhënësja e presidencës çeke, Eva Hrncirova thotë se shpreson që procesi të vazhdojë pa probleme. “Më në fund një lajm i mirë për Kosovën! Shpresoj që të vazhdojë pa probleme”.
Nga ana tjertër, diplomati austriak, Andreas Sumper e ka quajtur lajm të shkëlqyer vendimin e sotëm për vizat. “Lajm i shkëlqyer. Liberalizimi i vizave për Kosovën është në rrugë të mbarë. Hap i rëndësishëm është marrë sot në kuadër të presidencës çeke”.