Kuvendi komunal në Bujanoc ka votuar pro ndryshimit të emrit të shkollës fillore të fshatit Bilaç, nga “Desanka Maksimoviç” në “Ismail Kadare”.
Lajmin e ka bërë të ditur kryetari i Këshillit Kombëtar të Shqiptarëve në Luginë të Preshevës, Nevzat Lutfiu.
Nevzat Lutfiu falenderoi këshilltarët që votuan për këtë ndryshim.
Ky është hapi i parë për ndryshimin e emrit të kësaj shkolle pasi fjala e fundit i përket Ministrisë së Arsimit.
“I bëj thirrje ministres që iniciativën për ndryshimin e emrit ta gjykoj drejt, duke pasur parasysh se propozimi i ri që shkolla të ketë emrin “Ismail Kadare” është një nder edhe privilegj jo vetëm për shkollën dhe lokalitetin, pasi kemi të bëjmë me një shkrimtar të përmasave ndërkombëtare”, thotë Lutfiu.