Ministri i Jashtëm i Bjellorusisë, Vladimir Makei është ndarë nga jeta në moshën 64-vjeçare.
Makei mbante postin e tij që nga viti 2012. Ai kishte marrë pjesë në një konferencë të Organizatës së Traktatit të Sigurisë Kolektive (CSTO) – një aleancë ushtarake e disa shteteve postsovjetike – në Jerevan në fillim të kësaj jave, ndërsa të hënën do të takonte homologun rus Sergei Lavrov.
“Jemi të tronditur nga raportimet për vdekjen e kreut të Ministrisë së Punëve të Jashtme të Republikës së Bjellorusisë, Vladimir Makei”, shkroi zëdhënësja e Ministrisë së Jashtme ruse, Maria Zakharova.
Para zgjedhjeve presidenciale dhe protestave masive antiqeveritare në Bjellorusi në vitin 2020, Makei kishte qenë një nga nismëtarët e përpjekjeve për të përmirësuar marrëdhëniet e Bjellorusisë me Perëndimin dhe kishte kritikuar Rusinë.
Megjithatë, ai ndryshoi papritmas qëndrimin e tij pas fillimit të protestave, duke pretenduar se ato ishin frymëzuar nga agjentë të Perëndimit.