Autoriteti Rrugor Shqiptar (ARRSH) ka njoftuar se do të kryhet një shpërthim i kontrolluar me eksploziv në afërsi të guroreve Volloder, në kuadër të punimeve për ndërtimin e Bypass-it të Sarandës.
Sipas njoftimit, ndërhyrja do të zhvillohet pranë fshatit Shën Vasil dhe synon hapjen e trasesë së rrugës. Gjatë këtij intervali kohor, Policia e Shtetit do të marrë masat e nevojshme për menaxhimin e trafikut dhe garantimin e sigurisë së qarkullimit.
“Më 06.07.2026, duke filluar nga ora 09:00 deri në orën 10:00, në kuadër të punimeve për ndërtimin e Bypass-it të Sarandës, pranë fshatit Shën Vasil (në afërsi të guroreve Volloder), do të kryhet një shpërthim i kontrolluar me sasi të vogla eksplozivi, në funksion të hapjes së trasesë së rrugës.
Procesi i punës është koordinuar me strukturat e Policisë së Shtetit, të cilat do të marrin masat e nevojshme për menaxhimin e trafikut dhe garantimin e sigurisë së qarkullimit gjatë zhvillimit të punimeve.
Kërkojmë mirëkuptimin e qytetarëve dhe drejtuesve të mjeteve deri në përfundimin e plotë të këtij procesi pune“, njofton ARRSH.
