Sekretari i Përgjithshëm i PD, Flamur Noka është optimist se demokratët po shkojnë drejtë bashkimit të tyre në prag të zgjedhjeve vendore. Noka sqaron se edhe kryesia e PD për shkak të këtyre negociatave vendosi të mos nisë menjëherë procesin e primareve.
Për herë të parë PD do të ketë më shumë se 5 muaj përpara zgjedhjeve, kandidatët e saj.
“Më 4 dhjetor shqiptarët do të kenë publike të gjithë personalitetet e Partisë Demokratike dhe opozitës shqiptare që do t’iu japin shpresën e fitores në zgjedhjet e ardhshme vendore”, tha Noka për ABC.
Por përpara 4 dhjetorit, PD synon të ketë kandidat në 3 bashkitë e mëdha. Do të bëjmë gjitha përpjekjet që Tirana, Durrësi dhe Elbasani, të mund të ecin më shpejt për të përfunduar këtë proces.
Dy të mandatuarit e dy grupeve brenda PD, Paloka e Bardhi do të vijojnë takimet në ditët e ardhshme në funksion të zgjidhjes së modaliteteve në funksion të daljes me një kandidat të përbashkët në zgjedhjet vendore.