Në orët e para të mëngjesit të sotëm të datës 23 shkurt, saktësisht në 06:10, në pikëkalimin kufitar Bllacë, është paraqitur ish-zëvendëskryeministri i parë Artan Grubi, i cili menjëherë është ndaluar nga autoritetet dhe është dërguar në mbajtje për procedura të mëtejshme. Lajmi është konfirmuar nga burime të televizionit Alsat.
Sipas informacioneve zyrtare, ndalimi i tij vjen në kuadër të një hetimi të gjerë që po zhvillohet lidhur me dyshime për keqpërdorim të pozitës zyrtare, korrupsion dhe shkelje të ligjit për prokurim publik. Rasti ka të bëjë me mënyrën e funksionimit dhe me kontratat e lidhura nga Lotaria Shtetërore e Maqedonisë së Veriut, ku dyshohet se janë marrë vendime që kanë shkaktuar pasoja të rënda financiare.
Autoritetet e RMV pretendojnë se përmes procedurave të kontestuara të prokurimit janë favorizuar subjekte të caktuara ekonomike, duke dëmtuar buxhetin e institucionit. Sipas përllogaritjeve fillestare, dëmi i shkaktuar arrin në rreth 500 milionë denarë, që kap vlerën mbi 8 milionë euro. Hetimet janë fokusuar në disa kontrata dhe vendime specifike, për të cilat ekzistojnë dyshime se nuk janë respektuar standardet ligjore dhe parimet e transparencës.
Më herët, gjykata kompetente kishte caktuar masën e paraburgimit ndaj Grubit, ndërsa ai ishte shpallur në kërkim për shkak të mosparaqitjes para organeve të drejtësisë.
Arrestimi i sotëm pritet të hapë rrugë për zhvillimet e mëtejshme procedurale, ndërsa autoritetet kanë paralajmëruar se hetimi do të vazhdojë deri në zbardhjen e plotë të rastit dhe përcaktimin e përgjegjësive për çdo person të përfshirë në aferë.