Në Mirditë Ramës i kërkojnë ndërtimin e Selisë Kapidanore të Gjonmarkajve

Në kuadrin e programit zhvillimor turistik “100 fshatrat”, ku në Mirditë janë listuar Katundi i Vjetër dhe Oroshi, gjatë vizitës së sotme të Kryeministrit të Vendit Edi Rama në disa objekte infrastrukturore dhe sociale të përfunduara dhe në ndërtim e sipër, kryetari i bashkisë Ndrec Dedaj i ka kërkuar atij mundësinë e realizimit të dy projekteve thelbësore sa i përket trashëgimisë historike dhe kulturore në Orosh, pikërisht bërjen të mundur të realizimit të projektit të Muzeut të Abacisë si Kryekisha e Mirditës ndër shekuj me histori të ndritur, si dhe Selinë Kapidanore të Gjomarkajve, një nga dyert më të përmendura në Shqipërinë e disa shekujve, aty ku lindën Prijësit e Mirditës e që lanë vulën e vetqeverisjes së Mirditës sëbashku me Kishën, Kuvendet dhe Pleqtë e Urtë të Maleve. 
Kryeministrit i janë afruar në bisedë e sipër nga kryebashkiaku Dedaj edhe detaje rreth projektit, shoqëruar me foto të hershme, i cili tashmë e ka konfiguruar platformën e zhvillimit si fshat turistik, ku pos natyrës fantastike me bjeshkët, pyjet, malet, burimet e ujit, florën dhe faunën e pasur, por që nga pasuritë më të vyera, ka historinë e madhe ndër shekuj si kryeqendra e Mirditës, madje një nga faqet më të lavdishme edhe në historinë kombëtare.
Kryeministri Rama ka shfaqur interes për të dy projektet interesante si dhe Internatin e njohur të Oroshit, dhe ka kërkuar bashkëpunim në mes bashkisë me kishën dhe pinjollët e kësaj dere me emër në histori, që të rindërtohen Sarajet e dikurshme atje ku kanë qenë me synimin për t’i kthyer në një qendër pritëse për vizitorë vendas dhe të huaj me të gjitha atributet e hershme, duke premtuar projektet dhe fondet përkatëse për realizimin e tyre