Një 30-vjeçar po ushtronte dhunë psikologjike ndaj bashkëshortes së tij ndërkohë që në shtëpi kishte një armë zjarri. Ka qenë një telefonatë në sallën operative që parandaloi përshkallëzimin e ngjarjes.
Efektivët mbërritën menjëherë në shtëpinë e 30-vjeçarit në rrugën “Asdreni”, duke e vënë në pranga dhe duke sekuestruar armën e zjarrit tip kallashnikov me 22 fishekë.
NJOFTIMI I PLOTE
Policia parandalon përshkallëzimin e mëtejshëm të një rasti të dhunës në familje.
Ushtronte dhunë psikologjike ndaj bashkëshortes dhe mbante armë zjarri në banesë, vihet në pranga 30-vjeçari.
Sekuestrohet në cilësinë e provës materiale një armë zjarri kallashnikov, me një krehër me fishekë.
Shërbimet e Komisariatit të Policisë Nr. 1, pas njoftimit të marrë se në rrugën “Asdreni”, një 30-vjeçar kishte konflikt me bashkëshorten dhe mbante armë zjarri në ambientet e banesës së tyre, kanë shkuar menjëherë në adresën e dhënë duke parandaluar përshkallëzimin e dhunës në familje.
Gjatë kontrollit të ushtruar në këtë banesë u gjet dhe u sekuestrua në cilësinë e provës materiale një armë zjarri kallashnikov, me një krehër me 22 fishekë.
Në përfundim të veprimeve u bë arrestimi në flagrancë i shtetasit R. E., 30 vjeç dhe materialet i kaluan Prokurorisë pranë Gjykatës së Shkallës së Parë Tiranë, për veprime të mëtejshme.