Sulmuesi brazilian Nejmar ka qenë në epiqendër të zërave të merkatos në vitet e fundit në mënyrë të vazhdueshme, duke kërkuar edhe vetë që të largohej nga PSG. Por me sa duket gjithçka ka ndryshuar dhe ai nuk e mendon më një gjë të tillë, sidomos duke parë se Barcelona, destinacioni i tij i preferuar, është në një gjendje shumë të vështirë financiare e sportive.
Pas ndeshjes së sotme ndaj Bashakshehir, ku ai shënoi tre gola, vetë lojtari konfirmoi se nuk e mendonte largimin nga parisienët me të cilët në edicionin e kaluar shkoi në finalen e Ligës së Kampioneve e shpreson që të kthehet aty përsëri.
“Jam shumë i lumtur këtu në Paris. Jam shumë i lumtur në klub, me shokët e skuadrës. Ideja e largimit as që më shkon në mend. Kemi një marrëdhënie shumë të mirë, jam shumë i lumtur. Duhet të flasim dhe të shohim se çfarë do të ndodhë në të ardhmen”, tha lojtari pas duelit.
Ndërkohë, presidenti i PSG, Naser Al Khelaifi, deklaroi pas sfidës se kishte besim që si Nejmar, ashtu edhe Mbape, do të vazhdonin të qëndronin te parisienët.