Presidenti i Serbisë, Aleksandër Vuçiç ka përgënjeshtruar një lajm të shpërndarë nga mediat në Beograd se babai i tij biologjik ishte gazetari shqiptar nga Prizreni, Fahri Musliu.
Ai është shfaqur në një video-mesazh bashkë me babanë e tij, Angjelko Vuçiç, përmes së cilës i drejtohet popullit se lajmi është i pavërtetë dhe se është publikuar me qëllim për ta dëmtuar atë politikisht.
“Ata politikanë që mbrëmë tentuan të sulmojnë familjen Vuçiç përmes mediave të tyre, nuk sulmuan vetëm familjen tonë. Ata nuk sulmuan nënën time, gruan e babait tim, babain tim, mua… Ata sulmuan çdo familje në Serbi, duan shkatërrimin e familjeve tona dhe shkatërrimin e vendit tonë ashtu siç e shkatërruan nga viti 2000 deri në vitin 2012″, shprehet Vuçiç.
“Ata kanë shkruar, për ata që nuk e dinë, se njëfarë zoti Fahri Musliu është babai im, duke dashur të them se është. Unë jam krenar për babanë tim. Ai është shumë më i mirë se unë dhe unë kam mësuar shumë prej tij… Për nënën time dhe unë e di se sa e ndershme, besnike dhe e nderuar ishte ajo ndaj tij, familjes dhe vendit. Më lejoni t’ju them edhe një herë se babai im është Angjelko, e dua pafund dhe do t’i shpëtojmë të gjitha familjet në Serbi nga ju njerëz të papërgjegjshëm, nga ju të përndjekur, nga ju që do të shkatërroni gjithçka që ka bërë ky vend”, shtoi presidenti serb.