Kriza e mosbesimit të qytetarëve tek procesi i vetingut dhe jo vetëm, ka nevojë për një zgjidhje politike. Kështu është shprehur nënkryetarja e LSI-së Erisa Xhixho, e ftuar këtë mëngjes në “KafeIN’.
“Zgjidhja politike zgjidhet nga palët ,që do të thotë që kushtet që ne kemi vendosur për të hyrë në zgjedhje janë pikërisht garantimi i zgjedhjeve të lira dhe të ndershme, krijimi i një qeverie tranzitore, e cila do të mund të kishte disa objektiva, ndër të cilat garantimi i zgjedhjeve, ecja përpara e proceseve integruese të vendit”, tha Xhixho.
Xhixho tha se në sondazhin e fundit që është bërë nga Komiteti i Helsinkit, i mbështetur nga fondacioni për shoqëri të hapur del që 63% e shqiptarëve nuk besojnë të procesi i Vettingut dhe se ky sistem do të pastrohet.
“Besueshmëria ka rënë sepse Vettingu është shumë i ngadaltë me standarde te dyfishta dhe hetimi i subjekteve nuk është kryer me te njëjtën metodologji gjithmonë, kjo e raportuar se fundmi nga Brukseli si shqetësim i Operacionit Ndërkombëtar te Monitorimit i cili ja ka përcjell dhe zyrave në Tiranë tashmë. Kemi parasysh që nga 800 prokurorë dhe gjyqtarë që janë në sistem vetëm 130 e kanë kryer deri më sot”, theksoi Xhixho.
Nënkryetarja e LSI-së, tha se vendi ndodhet në një “një krizë politike, institucionale, dhe një mosfunksionim i dy pushteteve”.
“Qoftë të pushtetit legjislativ i cili ka humbur tashmë pluralizmin politik dhe mbas vendimit të opozitës për djegien e mandateve kemi një Parlamenti ilegjitim i provuar tashmë nga përgjimi jo i rastësishëm por nga ai i Prokurorisë së Krimeve të Rënda. Evidentohej qartë lidhja e krimit me blerjen e votës të zgjedhjeve te 2017. Gjë që çoi padyshim në një vendimmarrje shumë të fortë, ekstreme, të djegies së mandateve”, tha Xhixho.
