Kryeministri izraelit Benjamin Netanyahu ka lëshuar gjithashtu një deklaratë pas takimit me Sekretarin Amerikan të Shtetit Antony Blinken sot në Tel Aviv. Ai përmendi sulmin vdekjeprurës në Jerusalem, për të cilin Hamasi pretendoi se ishte kryer nga anëtarët e tij. Netanyahu tha se ishte i njëjti Hamas që po përpiqet t’i vrasë kudo.
“Unë i thashë: Ne jemi betuar, jam betuar, të eliminojmë Hamasin. Asgjë nuk do të na ndalojë”, tha Netanyahu.
Netanyahu thotë se i tha Blinken se Izraeli do të vazhdojë luftën derisa të arrijë tre qëllimet, të cilat ai thotë se janë: Lirimi i të gjithë pengjeve, eliminimi i plotë i Hamasit dhe sigurimi që asnjë kërcënim si ky nuk do të vijë më kurrë nga Gaza.
Që prej 7 tetorit, Izraeli ndërmori një sulm ushtarak të ashpër kundër Hamasit, duke bombarduar sistematikisht Rripin e Gazës. Por duke qenë se deri më tani, sipas palës palestineze janë me mijëra civilë të vrarë, Izraeli është kritikuar mjaft edhe nga faktori ndërkombëtar. Prej 7 ditësh ka një armëpushim mes Hamasit dhe Izraelit, i cili është shoqëruar me shkëmbim pengjesh izraelite dhe të burgosur palestinezë.