As helikopterët nuk kanë arritur të shuajnë plotësisht zjarret që kanë përfshirë Zonat e Mbrojtura në Zallë Gjoçaj e Ulëz, në Bashkinë e Matit.
Bëhet me dije së falë ndërhyrjes nga ajri dhe nga toka me forca të shumta ushtarake dhe civile perimetri i zjarrit në Ulëz është zvogëluar. Por, specialistë të emergjencave shprehen se rreziku i zgjerimit të vatrës ekziston pasi ka shumë trungje në flakë dhe era e fortë mund të ndikojë negativisht në përhapjen e zjarrit, siç ndodhi dhe netët e fundit.
Në vatrën e Zallë Gjoçajve është treguar kujdes për mbajtjen nën kontroll të situatës. Zjarri sipas specialistëve të Drejtorisë së Bujqësisë Mat është përhapur në dy drejtime, në anën veriore zjarri po përparon drejt Qafë Tollës dhe në anën lindore drejt Qafë Tanës, duke u favorizuar ndjeshëm nga era e fortë si dhe mbetjet e shumta drusore që janë tashmë në flakë.
“Gjatë ditës së sotme avioni Canader kroat ka kryer 12 operacione të hedhjes së ujit, i cili ka ndikuar në uljen e intensitetit të zjarrit. U angazhuan sakaq në vatrën e Ulzës 15 efektivë të FA, 20 punonjës të Bashkisë Mat, efektivë të Polisisë së Shtetit, 2 punonjës të Zonave të Mbrojtura si dhe 15 banorë të zonës. Ndërsa në Zallë Gjoçaj u angazhuan sot 15 forca bashkiake, 30 efektivë të FA, 15 vullnetarë, policia vendore”, tha drejtori i Emergjencave Civile në Bashkinë e Matit, Nezir Sinani.