Shqipëria pritet të mbajë sot në Bruksel Konferencën e 8-të Ndërqeveritare me Bashkimin Evropian, një tjetër hap në procesin e negociatave për anëtarësim, ku fokusi do të jetë te Grupkapitulli 1 “Themeloret” dhe përmbushja e piketave të ndërmjetme për sundimin e ligjit, drejtësinë dhe institucionet demokratike.
Konferenca e sotme vjen pas një serie takimesh ndërqeveritare që kanë shënuar progres gradual të Shqipërisë në hapjen e kapitujve të negociatave me BE-në në një kohë rekord prej 13 muajsh.
Procesi nisi zyrtarisht më 19 korrik 2022 me Konferencën e parë Ndërqeveritare BE-Shqipëri në Bruksel, ku Bashkimi Evropian hapi zyrtarisht negociatat e anëtarësimit me Shqipërinë.
Në atë konferencë, BE-ja vlerësoi angazhimin e Shqipërisë për reformat dhe harmonizimin e plotë me politikën e jashtme dhe të sigurisë të BE-së, ndërsa u hap rruga për procesin e “screening”-ut të acquis communautaire.
Një etapë vendimtare u shënua më 15 tetor 2024, gjatë Konferencës së dytë Ndërqeveritare në Luksemburg, ku u hap Grupkapitulli 1 “Themeloret”. Ky grupkapitull përfshin funksionimin e institucioneve demokratike, reformën në administratën publike, kriteret ekonomike dhe kapitujt:
Kapitulli 23 – Gjyqësori dhe të drejtat themelore
Kapitulli 24 – Drejtësia, liria dhe siguria
Kapitulli 5 – Prokurimi publik
Kapitulli 18 – Statistikat
Kapitulli 32 – Kontrolli financiar
Në këtë konferencë, BE-ja vendosi piketat e ndërmjetme për kapitujt 23 dhe 24, duke i konsideruar ato kyçe për ritmin e përgjithshëm të negociatave.
Më 17 dhjetor 2024 u zhvillua Konferenca e tretë Ndërqeveritare në Bruksel, ku Shqipëria hapi negociatat për Grupkapitullin 6 “Marrëdhëniet e Jashtme”, që përfshin:
Kapitullin 30 – Marrëdhëniet e jashtme
Kapitullin 31 – Politika e jashtme, e sigurisë dhe mbrojtjes
Një tjetër zhvillim i rëndësishëm erdhi më 14 prill 2025 në Luksemburg, gjatë Konferencës së katërt Ndërqeveritare, ku u hap Grupkapitulli 2 “Tregu i Brendshëm”.
Ky grupkapitull përfshin nëntë kapituj:
Kapitulli 1 – Lëvizja e lirë e mallrave
Kapitulli 2 – Lëvizja e lirë e punëtorëve
Kapitulli 3 – E drejta e vendosjes dhe ofrimit të shërbimeve
Kapitulli 4 – Lëvizja e lirë e kapitalit
Kapitulli 6 – E drejta e kompanive
Kapitulli 7 – Pronësia intelektuale
Kapitulli 8 – Politika e konkurrencës
Kapitulli 9 – Shërbimet financiare
Kapitulli 28 – Mbrojtja e konsumatorit dhe shëndetit
Më pas, në Konferencën e pestë Ndërqeveritare, më 22 maj 2025, BE-ja hapi negociatat për Grupkapitullin 3 “Konkurrueshmëria dhe rritja gjithëpërfshirëse”, ku përfshihen:
Kapitulli 10 – Transformimi digjital dhe media
Kapitulli 16 – Tatimet
Kapitulli 17 – Politika ekonomike dhe monetare
Kapitulli 19 – Politika sociale dhe punësimi
Kapitulli 20 – Politika e ndërmarrjeve dhe industriale
Kapitulli 25 – Shkenca dhe kërkimi
Kapitulli 26 – Arsimi dhe kultura
Kapitulli 29 – Bashkimi doganor
Më 16 shtator 2025 u zhvillua Konferenca e gjashtë Ndërqeveritare, ku u hap Grupkapitulli 4 “Agjenda e gjelbër dhe ndërlidhja e qëndrueshme”, që përfshin:
Kapitullin 14 – Politika e transportit
Kapitullin 15 – Energjia
Kapitullin 21 – Rrjetet transevropiane
Kapitullin 27 – Mjedisi dhe ndryshimet klimatike
Ndërsa më 17 nëntor 2025 u mbajt Konferenca e shtatë Ndërqeveritare, ku u hap edhe grupkapitulli i fundit negociues, Grupkapitulli 5 “Burimet, bujqësia dhe kohezioni”, me kapitujt:
Kapitulli 11 – Bujqësia dhe zhvillimi rural
Kapitulli 12 – Siguria ushqimore, politika veterinare dhe fitosanitare
Kapitulli 13 – Peshkimi dhe akuakultura
Kapitulli 22 – Politika rajonale dhe koordinimi i instrumenteve strukturore
Kapitulli 33 – Dispozitat financiare dhe buxhetore
Me hapjen e të gjashtë grupkapitujve, Shqipëria ka hyrë tashmë në fazën e thellimit të negociatave dhe përmbushjes së piketave për mbylljen e kapitujve.
Konferenca e 8-të Ndërqeveritare që mbahet sot pritet të konfirmojë përmbushjen e piketave të ndërmjetme për Grupkapitullin 1 “Themeloret” dhe të përcaktojë piketat përfundimtare për kapitujt që lidhen me sundimin e ligjit, drejtësinë, administratën publike dhe kriteret ekonomike.
Sipas metodologjisë së rishikuar të zgjerimit të BE-së, progresi në Grupkapitullin “Themeloret” mbetet përcaktues për ritmin e përgjithshëm të negociatave të anëtarësimit të Shqipërisë në Bashkimin Evropian.