Ndryshe nga herët e tjera, zv.kryetari i LSI-së Luan Rama u ka kërkuar qytetarëve të marrin pjesë në protestën e sotme me vargje. Ish deputeti dihet që ka pasion të tijin letërsinë dhe në një status në Facebook ka postuar disa vargje pa asnjë koment.
Zv.kryetari i LSIs-së Luan Rama ka zgjedhur një poezi të Hamit Aliaj, me titull “Dy Dritare”. Shkrimtarët po përmenden shumë këto ditë e fundit, kujtojmë këtu dhe kryemiministrin Edi Rama që përmendi Ismail Kadarenë, apo dhe Elisa Spiropali vargjet për Haxhi Qamilin, duke bërë analogji me aktualitetin, secili sipas këndvështrimit të vetë.
“Dy dritare” është poezia e poetit Aliaj, që përbëjnë simbolikën e bulevardit ku do te zhvillohet protesta e paralajmeruar per sonte ne oren 20:00, pikërisht në hapësirën mes dy dritareve ku vjell historia, siç thotë poeti.
Kjo është poezia e përzgjedhur nga Luan Rama:
DY DRITARE
Dritarja e diktatorit
Si llampë morgu,
Rri mbi bulevardin “Dëshmorët e Kombit”,
Njëqind metër larg,
Në ndërtesën përballë,
Fantazma kryeministrash,
Të vdekur, të gjallë…
Shtatë ditë iu deshën Dante Aligerit,
Të shihte Parajsën, Purgatorin, Ferrin …
Po njëqind vjet,
Rruga mes dy dritaresh,
Në Tiranën e tiranëve,
Zezonë funeralesh.
Tirana e tiranëve,
I ka kohët ndryshe:
Në mëngjes je vajzë,
Në darkë ngrysesh gjyshe,
Në dy dritare vjell historia:
Nga dritarja e Diktatorit,
Te Kryeministria !