Deri pak vite më parë, çadra ishte një aksesor që dilte nga dollapi vetëm kur parashikohej shi. Sot, në shumë qytete europiane, ajo po rikthehet si një nga produktet më të kërkuara të verës.
Valët gjithnjë e më intensive të të nxehtit kanë sjellë në qendër të vëmendjes atë që industria e modës e quan tashmë “sunbrella” – çadra që përdoret për mbrojtje nga dielli. Nga javët e modës në Paris e Milano, te pistat e Formula 1 dhe rrugët e Londrës, çadrat po shihen gjithnjë e më shpesh si pjesë e veshjes së përditshme dhe jo vetëm si mbrojtje nga reshjet.
Ky ndryshim po reflektohet edhe në shitje. Prodhuesit raportojnë se kërkesa për çadra gjatë muajve të verës është rritur ndjeshëm. Marka britanike Original Duckhead thotë se sezoni i shitjeve nuk kufizohet më vetëm në dimër, ndërsa dyqane historike si James Smith & Sons, që shet çadra që prej vitit 1830, po shohin rikthimin e modeleve klasike të çadrave për diell, të njohura dikur në epokën viktoriane.
Paralelisht po krijohet edhe një segment i ri premium. Në treg po shfaqen çadra me filtra UV, materiale reflektuese dhe pëlhura speciale që premtojnë mbrojtje më të mirë nga rrezatimi diellor. Çmimet variojnë nga rreth 20 paund për modelet bazë deri në mbi 80 paund për versionet premium.
Megjithatë, ekspertët thonë se diferenca nuk është gjithmonë aq e madhe sa sugjeron marketingu. Sipas specialistëve të dermatologjisë, pothuajse çdo çadër me pëlhurë të dendur bllokon një pjesë të konsiderueshme të rrezatimit UV dhe, mbi të gjitha, ul ndjeshëm nxehtësinë që merr trupi nga ekspozimi direkt në diell.
Modelet me ngjyra të çelëta ose sipërfaqe reflektuese janë edhe më efikase për të mbajtur temperaturën më të ulët.
Fenomeni tregon se ndryshimet klimatike nuk po ndikojnë vetëm energjinë, turizmin apo bujqësinë. Ato po transformojnë edhe industrinë e modës dhe tregun e aksesorëve. Ashtu si kremi kundër diellit, syzet apo shishet termike u bënë produkte të domosdoshme, edhe çadra po fiton një rol të ri: nga simbol i ditëve me shi në një investim për ditët me temperatura ekstreme.