Koordinatori i Bindjes Demokratike, Astri Patozi, në studion e “Ditari” në A2, komentoi vrasjen që ndodhi sot në Elbasan, ku nga një përplasje me armë zjarri mbeti i vrarë Pjerin Xhuvani, ish-kryetar i LSI-së në Elbasan, ish-zyrtar dhe së fundmi simpatizant aktiv i Partisë Socialiste në degën e Elbasanit.
“Është një ngjarje shumë e rëndë, dramatike. Uroj që të jetë e fundit dhe të shërbejë sadopak për uljen e gjakrave, pasi humbja e jetës së një shqiptari për pushtetin e dikujt tjetër nuk ka kuptim. Është pasojë e një politike agresive, që mbarset dita-ditës nga një regjim kryetarokracie. Janë të njëjtat forca që këmbejnë pushtetin 30 vjet në Shqipëri, që e konsiderojnë njëra-tjetrën armike, por që pas zgjedhjeve bëjnë flirte”, tha Patozi.
“Shpresoj që shqiptarët ta lexojnë siç duhet, të tërhiqen dhe të mos ndjekin pas politikën që shkel mbi kufomat e tyre, që nuk ka qëllim tjetër përveçse marrjen apo ruajtjen e pushtetit. Do të doja shumë që politikanët të distancohen nga kjo ngjarje”, shtoi koordinatori i Bindjes Demokratike.
Sipas tij, ky episod do të jetë i fundit: “Nuk besoj që shqiptarët do të vazhdojnë të humbasin më jetën e tyre për pushtetin e disa personazheve që i kanë dhënë të gjitha provat që nuk kanë ç’i japin më shumë këtij vendi përveç ngjarjeve të tilla”.
“Nuk e kuptoj pse këtyre 3 palëve (PS, PD dhe LSI) u duhen badigardë? Mesazhi im është që shqiptarët të refuzojnë ata që për fushatat e tyre kanë nevojë për badigardë, që i përdorin shqiptarët si mish për top”, u shpreh Astrit Patozi.