Një foshnje tremuajshe u dogj e gjallë brenda një ambulance, pasi një bombol oksigjeni shpërtheu në një autostradë.
Incidenti ndodhi në rrethin e Silivrit në provincën veriperëndimore të Stambollit këtë javë.
Ambulanca u përfshi nga zjarri dhe u dogj anës rrugës në Autostradën Trans-Evropiane.
Mediat vendase njoftojnë se mjeti po udhëtonte për në krahinën e Edirnesë.
Foshnja, e quajtur Rojin, ishte në një inkubator pranë nënës së saj, kur një bombol me oksigjen shpërtheu. Shkaku i incidentit është ende i panjohur.
Nëna e foshnjës dhe stafi i ambulancës ishin në gjendje të iknin nga ambulanca në flakë, por fëmija vdiq brenda automjetit.
Shërbimet emergjente u thirrën në vendngjarje dhe zjarrfikësit shuan zjarrin.
Nëna e foshnjës, e identifikuar si Necmiye S., i ra të fikët pas incidentit kur pa foshnjën e saj të djegur, njoftoi media lokale.
Ajo duhej të qetësohej nga mjekët dhe një tjetër ambulancë mbërriti në vendngjarje për ta marrë atë për në spital për trajtim.
Në një deklaratë, ajo tha: “Papritmas, diçka ndodhi dhe zjarri shpërtheu nga shpina. Mjekët e urgjencës dolën jashtë dhe unë gjithashtu kërceva nga ambulanca. Mjekët nuk mundën të hynin për të shpëtuar fëmijën tim dhe ikën. Atje ishin tre vetë me vajzën time, por kur filloi zjarri nuk ishte asnjë.”
Një hetim policor po vazhdon për të sqaruar rastin.