Nënkryetari i Partisë Demokratike Edi Paloka në një dalje për mediat foli mbi incidentin e një dite më parë në Peshkopi. Por sipas tij bëhet fjalë për dhunë shtetërore dhe jo nga ana e protestuesve, dhe për këtë ai publikoi fjalët e infermieres së spitalit në Dibër.
Paloka thotë se nuk u përdor molotov. “Dibra është prova më e qartë e dhunës shtetërore. Policë, forca speciale të ushtrisë me maska, pa identifikim, kanë dhunuar e terrorizuar gjatë natës qytetarët. Sandër Lleshaj mashtron, asnjë polic nuk është lënduar dhe asnjë molotov nuk është hedhur”, tha ai në konferencën për shtyp.
Ai vijoi duke akuzuar se “dhuna shtetërore në Dibër organizohet nga e njëjta bandë shtetëroro-kriminale që ka dalë në përgjimet e BILD-it, duke blerë vota, duke kërcënuar dhe dhunuar qytetarët, duke penguar votën e kundërshtarëve”.
Madje ai ka dhe një porosi për qytetarët që të filmojnë e denoncojnë çdo dhunim apo presion që u bëhet. “Partia Demokratike fton çdo qytetar të mos bjerë pre e provokimeve të Edi Ramës: Filmoni, regjistroni, fotografoni dhe denonconi çdo dhunim, presion, fallsfikim, mashtrim që regjimi i tij bën”, tha Paloka.