Pas betimit tek Presidenti i Republikës, znj. Besa Shahini ka marrë zyrtarisht detyrën e ministres së Arsimit, Sportit dhe Rinisë. Ministrja e re është pritur nga ish-ministrja Lindita Nikolla së bashku me stafin e institucionit për t’a uruar për detyrën e re. Znj. Nikolla në fjalën e saj shprehu mirënjohje për të gjithë bashkëpunëtorët dhe theksoi bindjen se ministrja Shahini do të thellojë edhe më tej reformat e ndërmarra në sistemin arsimor. Ndërsa ministrja Besa Shahini vlerësoi kurajon që pati znj. Nikolla për të bërë ndryshimet e pritshme dhe u tregua e gatshme për të vijuar bashkëpunimin për reformat që janë në proces.
“Sot mora zyrtarisht detyrën e Ministres së Arsimit, Sportit dhe Rinisë në Republikën e Shqipërisë. Paraardhësja ime Lindita Nikolla, me të cilën punova ngushtë për 15 muaj si zëvendësministre, ka drejtuar këtë ministri me shumë kurajë dhe durim. Kurajën për të marrë vendime të vështira që sollën ndryshime të mëdha në sistemin arsimor dhe durimin për të dëgjuar dhe konsultuar të gjithë hisedarët para se të merrte ato vendime. Unë shpresoj që këto virtyte të më përcjellin dhe mua në zbatimin e kësaj detyre të rëndësishme, sidomos në këtë moment sfide që ngërthen në vetvete edhe një mundësi të madhe për të realizuar idetë më të mira për arsimin shqiptar”- pohon Shahini.