Të shumta kanë qenë reagimet pas vrasjeve makabre sot në Tiranë.
Kryetarja e Kuvendit të Shqipërisë Lindita Nikolla shprehet në një postim në rrjetet sociale se; “Sistemi i drejtësisë që, siç rezulton, i ka dhënë një krimineli e dhunuesi një dënim qesharak”.
Ajo shton se ky person, me rekorde kriminale, e trajtonte të fejuarën si sllave në sy të banorëve të zonës.
Nikolla thotë se ligjet ndoshta duhen ashpërsuar.
Postimi i Nikollës:
Nuk gjej fjalë të ngushëlloj familjet e grave që u morën jetën tragjikisht!
Ngjarja e sotme shumë e rëndë në Kamëz, vrasja e tre grave dhe plagosja e tre të tjerave, duhet të na bëjne të reflektojmë dhe të vihemi të gjithë në lëvizje.
Sistemi i drejtësisë që, siç rezulton, i ka dhënë një krimineli e dhunuesi një dënim qesharak.
Institucionet që nuk kanë vepruar, ndërkohë që vrasësi, me një histori të njohur e të gjatë kriminale, e trajtonte të fejuarën si skllave dhe në sy të komunitetit.
Dështimi në parandalimin e këtij krimi të rëndë është një alarm për të gjitha agjencitë ligjzbatuese, institucionet, komunitetin, shoqërinë.
Ligjet ndoshta duhen ashpërsuar!
Por zbatimi i tyre dhe sidomos masat parandaluese mbeten një pikë e dobët e institucioneve dhe shoqërisë!