Këtë të premte, më 27 shkurt, në Dhomat e Specializuara të Kosovës në Hagë ka nisur gjyqi, në rastin për pengim të drejtësisë ndaj ish-presidentit Hashim Thaçi.
Në këtë seancë, ishte parashikuar se do të shpalosen deklaratat hyrëse në rastin kundër Hashim Thaçit, Bashkim Smakajt, Isni Kilajt, Fadil Fazliut dhe Hajredin Kuçit, të cilët akuzohen për pengim të drejtësisë. Por REL shkruan se mbrojtja e Thaçit dhe ajo e Fazliut kanë njoftuar se nuk do të bëjnë deklarata hyrëse, por do ta rezervojë të drejtën që të deklarohen më vonë gjatë procesit gjyqësor.
Sipas aktakuzës, ish-presidenti i Kosovës, Hashim Thaçi, dyshohet se ka bashkërenduar “tri grupe të veçanta” së bashku me Kilajn, Kuçin dhe Fazliun për të ndikuar në dëshmitë e dëshmitarëve të Prokurorisë së Specializuar në rastin kundër tij dhe ish-eprorëve të tjerë të Ushtrisë Çlirimtare të Kosovës, Kadri Veseli, Jakup Krasniqi dhe Rexhep Selimi, që akuzohen për krime lufte dhe krime kundër njerëzit. Gjykimi për krime lufte është përmbyllur dhe tani çështja është në dorën e trupit gjykues.
Pas deklaratave hapëse, Zyra e Prokurorit të Specializuar do të nisë me paraqitjen e provave për rastin e pengimit të drejtësisë.