Teksa jashtë Parlamentit vijojnë përplasjet mes protestuesve dhe forcave të policisë, Grupi Parlamentar i Partisë Demokratike ka vendosur të mos marrë pjesë në seancën plenare të kësaj të enjteje.
Në një deklaratë zyrtare, demokratët akuzojnë mazhorancën se po bllokon nismat e opozitës dhe se ka rrethuar Kuvendin me një numër të madh efektivësh policie, me qëllim, sipas tyre, “pengimin e zërit të qytetarëve” që protestojnë prej më shumë se një muaji.
Partia Demokratike pretendon gjithashtu se është refuzuar kërkesa e saj për zhvillimin e një debati parlamentar me Kryeministrin Edi Rama lidhur me shqetësimet e protestuesve dhe rekomandimet e Rezolutës së Parlamentit Europian.
Sipas PD-së, mazhoranca ka përjashtuar nga kalendari i punimeve katër projektligje të depozituara rreth një muaj më parë, të cilat lidhen me shfuqizimin e ndryshimeve në ligjin për zonat e mbrojtura, ligjin për investimet strategjike, Paketën e Maleve dhe disa dispozita të ligjit për trashëgiminë kulturore.
Në deklaratë theksohet se këto nisma lidhen drejtpërdrejt me kërkesat e qytetarëve dhe, sipas opozitës, duhet të ishin përfshirë në rendin e ditës së Kuvendit.