Në Novisad të Serbisë ka nisur takimi trilateral mes Presidentit serb Aleksandër Vuçiç, kryeministrit shqiptar Edi Rama dhe atij maqedonas Zoran Zaev.
Mediat serbe thonë se tema kryesore e bisedimeve do të jetë nisma e inciuar nga presidenti serb Vuçiç për një Shengen të vogël. Në fakt kjo u diskutua në takime informale mes tyre në Nju Jork, në kuadër të Asamblesë së Përgjithshme të OKBS-së, por ky propozim do të shqyrtohet më me detaje në këtë takim me dyer të mbyllura që pritet të zgjasë dy orë.
“Vecernje Novosti”, shkruan se ideja e Vuçiç për shengenin ballkanik synon të përfshije gjashtë shtete: Serbinë, Maqedoninë e Veriut, Shqipërinë, Malin e Zi, Bosnjë Hercegovinën dhe Kosovën e Metohinë. Brenda këtij projekti përfshihet lëvizja e lirë për 20 milionë njerëz në total.
Qëllimi i këtij shengeni është integrimi më i mirë i tregjeve të vendeve të rajonit dhe heqja e pengesave për biznesin dhe lëvizjen e lirë të mallrave, njerëzve, shërbimeve dhe kapitalit.
Vuçiç gjithashtu synon të shkojë një hap më tej në lidhje me marrëvshjen e CEFTA-s, por që u vu në dyshim pasi Prishtina vendosi taksën 100 për qind për mallrat serbe.
Takimi po zhvillohet në “Pavijonin e Oficerëve” në kalanë e Petrovaradinit.