Këtë të hënë, 16 shkurt, kanë nisur shkarkimet e kontrolluara nga hidrocentralet në kaskadën e lumit Drin, pra Fierzë, Koman dhe Vau i Dejës.
Sipas njoftimit të Korporatës Elektroenergjike Shqiptare (KESH), përgjatë pasdiotes është vënë re rritje e niveleve të lumenjve Drin, Bunë, por dhe të Liqenit të Shkodrës. Arsyeja qëndron tek reshjet dhe rritjes së temperaturave.
Pritet që të ketë rritje të mëtejshme të niveleve të lumenjve, veçanërisht në territorin e Nënshkodrës.
Sakaq, sipas Bashkisë Shkodër, kjo e fundit ka marrë masat e nevojshme për menaxhimin e situatës në bashkëpunim me strukturat e emergjencave civile.
Sipas sinoptikanëve, shkurti i këtij viti është nën kushte atmosferike jo normale për muajin, me shumë reshje dhe i ngrohtë, ndërsa përgjithësisht karakterizohet nga një mot i thatë dhe i ftohtë.
Parashikohej ndërprerja e shiut ditën e hënë, për t’u rikthyer me intensitet më të lartë të martën. Madje disa qarqe rrezikojnë sërish përmbytje, përfshirë këtu dhe Shkodrën.
Intensiteti i reshjeve pritet të ulet pas ditës së mërkurë. Ndërsa duke filluar nga data 20 shkurt, në vend rikthehet moti me diell, por temperaturat do të ulen ndjeshëm. Në ditët e fundit të shkurtit termometri zbret disa gradë nën zero.