Kreu i Partisë së Lirisë, Ilir Meta është takuar me Drejtorin për Europën të Institutit Ndërkombëtar Republikan, Paul McCarthy, teksa ka zbardhur dhe bisedën me të. Përmes një postimi në Facebook, Meta shkruan se bashkëpunimi mes Partisë së Lirisë dhe IRI ka qenë veçanërisht i frytshëm për rritjen e kapaciteteve të rinisë, vajzave e zonjave të angazhuara në forumet tona. Kurse mbrëmë ishte ish-kreu i PD-së Lulzim Basha ai që takoi amerikanin, ku përmes një mesazhi në Twitter, ai shkruan se gjatë darkës pati kënaqësinë të shkëmbente mendime me mikun e tij Paul McCarthy.
Postimi i plotë i Ilir Metës
Pata kënaqësinë ta nisja ditën e takimeve sot me Drejtorin për Europën të Institutit Ndërkombëtar Republikan, Paul McCarthy, me të cilin ndamë vlerësime për demokracinë në Shqipëri dhe për zhvillimet aktuale në rajonin tonë.
Bashkëpunimi mes Partisë së Lirisë dhe IRI ka qenë veçanërisht i frytshëm për rritjen e kapaciteteve të rinisë, vajzave e zonjave të angazhuara në forumet tona. Do të vazhdojmë këtë bashkëpunim të shkëlqyer edhe më tej, duke mundësuar asistencë amerikane për të zgjedhurit e Partisë së Lirisë në këshillat bashkiakë gjatë këtij mandati që sapo kanë filluar.
Rikthimi i llogaridhënies në pushtetin vendor është prioritet kyç për Partinë e Lirisë ndaj dhe rritja e mbështetjes për këshilltarët tanë të zgjedhur është shumë e mirëpritur.
E falenderova Drejtorin McCarthy për aktivitetin e IRI në Shqipëri në mbështetje të partive politike, duke shprehur kërkesën për programe të veçanta në fushën e luftës ndaj korrupsionit dhe rikthimit të llogaridhënies, si dy faktorë kyç ndikues në shpopullimin masiv të vendit.
