Një grup pedagogësh, të mbledhur nga ish-këshilltari i Sali Berishës, Ermal Hasimja, i janë bashkuar sot protestës në Tiranë, në mbështetje të protestuesve dhe kërkesës për dorëheqjen e kryeministrit Edi Rama.
Pjesë e grupit janë edhe Jamarbër Malltezi, dhëndri i ish-kryeministrit Sali Berisha, dhe vajza e tij, Argita Berisha, si dhe figura të tjera të lidhura me Partinë Demokratike.
Pedagogët u mblodhën fillimisht përpara Universitetit Politeknik të Tiranës dhe më pas marshuan drejt godinës së Kryeministrisë, ku u dëgjuan thirrjet “Dorëheqje”, “Polici e Shtetit, jo e pushtetit” dhe “Hiqni kapelet”.
Me të mbërritur para Kryeministrisë, protestuesit përmbysën 12 karriget që Rama kishte vendosur më herët në formë rrethore, si një ftesë simbolike për dialog. Ata grisën gjithashtu pankartat me mbishkrimin “DIALOG”.
Veprimi erdhi pasi një grup pedagogësh kishte firmosur më herët një peticion, përmes të cilit kërkohej dorëheqja e kryeministrit Edi Rama dhe ndalimi i dhunës nga Policia e Shtetit.