Kampionati italian i futbolli është kthyer në vendin ku gjenden tashmë pjesa më e madhe e mbrojtësve të përfaqësueses shqiptare të futbollit, ashtu si edhe një pjesë e atyre që synojnë që në të ardhmen të veshin fanellën e skaudrës së drejtuar nga Edi Reja. Një prej tyre është Serxhio Kalaj, një talent I cili ka shkëlqyer në akademinë e Lacios e që tashmë ka shkuar në Serinë C për të bërë eksperience.
Për Kalajn, kjo fundjavë ka qenë e veçantë, pasi regjistroi ndeshjen e tij të parë si titullar me fanellën e klubit të Grosetos, duke luajtur kundër Pro Patrias. Lojtari u rreshtua në fushë nga minuta e parë në mbrojtjen me tre që do të jetë një modul që mund të përdoret në të ardhmen e do t’i japë mundësinë atij që të luajë më rregullisht.
“Jam shumë i lumtur për ndeshjen time të parë si titullar”, tha pas ndeshjes mbrojtësi i datëlindjes 2000 i cili është kontingjent i përfaqësueses Shpresa dhe është një nga elementët që po monitorohet edhe nga stafi i përfaqësueses A. “Trajneri më ka dhënë gjithmonë besim duke më aktivizuar vazhdimisht. Tani ishte hera e parë që luanim me tre në mbrojtje dhe mund të jetë një alternativë që mund të përdorirm”, tha ai. Një fillim i mirë për djaloshin në eksperiencën e parë jashtë akademisë, me shpresën që në vijim të vazhdojë të gjejë më shumë hapësira.