Edi Reja është trajneri më i ri i kombëtares shqiptare. 73-vjeçari u prezantua ditën e djeshme si “timonieri” i kuqezinjve, teksa firmosi deri në nëntorin e këtij viti, me opsion edhe për një sezon tjetër.
Por, kush është Edi Reja? Ish-tekniku i Lazios dhe Napolit ka drejtuar 22 skuadra gjatë karrierës, ndërsa Shqipëria është kombëtarja e parë në karrierën e tij. Reja ka lindur në fshatin Loçnik, që ndodhet në periferi të qytetit slloven, Gorica, pranë kufirit me Italinë.
Babai i Rejës ishte slloven, ndërsa nëna e tij ishte italiane. Megjithatë, jeta e trajnerit që u zyrtarizua dje në pankinën kuqezi është e lidhur vetëm me Italinë.
Ai është në gjendje të flasë edhe gjuhën sllovene, por jo aq rrjedhshëm sa atë italiane. Reja njihet në vendin fqinj si një mik i ngushtë i legjendës së trajningut italian, Fabio Capello. Me këtë të fundit u njoh që në vitet ’60, kur të dy luanin në mesfushë te SPAL.
Reja është martuar me gruan e tij Livia në vitin 1969, teksa mediat italiane raportojnë një histori interesante për këtë lidhje. Ai e njohu për herë të parë Livian ndërsa ishte në dhomë me Fabio Capelon gjatë një grumbullimi në Ferrara, kur të dy luanin me SPAL 1907.
Në Serinë A si futbollist Reja numëron 124 ndeshje të luajtura deri në vitin 1975, kur dhe u tërhoq nga futbolli për të nisur trajningun .