Rozina Kurti nga Burreli ka sjellë në jetë fëmijën e saj të 8 mes vështirësive të shumta. Ajo është transportuar me helikopter në Tiranë ku lindi dhe djalin e saj. Një bebe e gjinisë mashkull, me peshë 3.95 kg, erdhi në jetë i shëndetshëm, edhe pas gjithë peripecive që kaloi nëna e tij, 41-vjeçare.
Mesditën e kësaj të premteje, Rozina Kurti nga Burreli, është dashur të transportohet lehonë me helikopter për në Tiranë për shkak të komplikacioneve që pati, dhe rrugëve me borë dhe ngrica. Ajo është nënë e 8 fëmijëve, 5 vajzave, dhe tashmë e 3 djemve.
“Gjendja jonë ekonomike dobët është, fukara jemi, kam 7 kalamaj, ky është i tetë, fizikisht ndjehem mirë”-thotë Rozina Kurti. Ndërsa mjeku gjinekolog Ervis Llata, që ndoqi dhe lindjen e Rozina Kurti shpjegon komplikacionet që hasën.
“Neve u njoftuam nga kolegët tanë që ndodhen në Burrel dhe që për momentin dhe po bëjnë patronazhimin, që si pasojë e kushteve të këqija atmosferike, dhe gjendjes jo të mirë si të nënës dhe të bebes, është detyruar të transportohet për në Tiranë. Morëm të gjitha masat e nevojshme për të pritur nënën, dhe për kë kryer një lindje sa më të shpejtë se kushtet e bebit nuk prisnin për afatgjatë”, tha Ervis Llata, mjek gjinekolog
Rozina Kurtit ndodhet në gjendje të vështirë ekonomike. Bashkë me 8 fëmijët e saj dhe bashkëshortin jeton në një banesë të rrënuar, ndërkohë që deri ditën e fundit të shtatzënisë, së bashku me 5 vajzat dhe 3 djemtë, Rozina ka qenë duke mbledhur dru në pyll.