Presidenti i Partisë së Lirisë, Ilir Meta ka urdhëruar anëtarët e partisë së tij dhe ata të kryesisë që brenda datës 23 maj të kenë të përfunduar analizën për rezultatin e marrë në zgjedhjet e 11 majit. Meta kërkon verifikimin e punës dhe rolin e të gjithë anëtarëve gjatë ditës së votimit dhe numërimit të votave në ditët pasardhëse.
Një kërkesë e veçantë është dhe për të ngarkuarin me punë për Diasporën, për kontaktet që ai ka pasur dhe a janë pasqyruar votat që priteshin në rezultatin përfundimtar. Këto analiza do t’i dorëzohet zyrtarëve të PL, Haxhinasto, Blushi dhe Ballmi dhe të gjitha do të shqyrtohen në mbledhjen e kryesisë më 1 qershor.
Ilir Meta garoi në listën e hapur të PD-ASHM për Qarkun Tiranë, ku mori 7981 vota, jo të mjaftueshme për të hyrë në parlament, pasi koalicioni fitoi vetëm 13 mandate në këtë qark, duke i dhënë mundësinë vetëm Jorida Tabakut të rizgjidhet si deputete si më e votuara e listës së hapur.
