Avokati Sajmir Visha ka folur mbrëmjen e sotme për situatën në Policinë e Shtetit.
Visha theksoi se nuk mund të presësh punë të suksesshme nga efektivë policie që paguhen me rroga minimale dhe se janë bërë pjesë e krimit të organizuar.
Visha tha ndër të tjera se kjo që po ndodh kohët e fundit në vendin tonë, me shtimin e krimeve nga vetë punonjësit e policisë është e frikshme dhe kërcënon sigurinë e çdo qytetari.
“Ne presim që policia të parandalojë dhe të godasë veprat penale ndërsa sot në SPAK ke shumë policë e drejtues policie me hetime të hapura. Jemi në momenti më kritik të policisë së Shtetit, duhet të jemi dhe mirënjohës sepse vjet policia në eveniment ndërkombëtar mori notë kaluese. E dyta, Nëse do të flasim për policinë dhe gjynahet e saj, nuk mund të presim produkt nga një polici që paguhet 400 500 mijë lekë.
Me këtë lloj rroge, sheh Shqiponjat apo të policisë rrugore që shesin dhe lëndë narkotike. Janë bërë pjesë e fajdeve, pjesë e krimit të organizuar. Duhet ta flasim këtë gjë, sepse po paguhen nga taksat tona.
Është e frikshme sepse për sytë tanë duhet të jenë duke na mbrojtur, por këta plagosin e po vrasin nëpër komisariate. Ajo akademi rendi që përgatit punonjës policie duhet ringritur, nuk duhen aventurierë me pistoletë në brez, ata mund të vrasin ministrin e kryeministrin se janë të papërgjegjshëm. Duhet të jesh gjakftohtë e zemërmadh”-tha Visha.