PSG është finalistja e parë e Champions League. Francezët edhe një herë kanë treguar se janë tjetër nivel dhe një skuadër si Lajpcig e kishte të pamundur t’i bënte ballë yjeve parizienë. Përveç portierit Navas, i gjithë “arsenali” i Tuhel ishte në fushë dhe askush nuk zhgënjeu, duke arritur të fitojnë pastër me shifrat 0-3.
Një ndeshje, që foli thuajse e gjitha për ta. Sfidën e hapi Markinjos, që fluturoi mbi të tjerët dhe i mori më të mirën krosit të Nejmar. Më pas skenën e mori Anhel Di Maria, padyshim “lojtari i ndeshjes”. Argjentinasi fillimisht shënoi pas asistit të Nejmar (dy asiste sonte) e më pas asistoi për Bernat në pjesën e dytë, duke shënuar golin e tretë për të tijët.
Formë e shkëlqyer e skuadrës së Tuhel në Champions League, ku në 34 ndeshjet e fundit kanë mundur të gjejnë të paktën një herë golin, duke barazuar Real Madrid në këtë arritje. Tashmë PSG pret e qetë gjysmëfinalen mes Bajernit dhe Olimpik Lion për të mësuar sfiduesin në betejën finale të Champions League të këtij sezoni.
Lajpcig-PSG 0-3
Markinjos 13′, Di Maria 42′, Bernat 56′
Lajpcig: Gulashi; Klosterman, Upamekano, Mukiele; Laimer, Kampëll, Sabitzer, Anhelino; Olmo, Nkunku; Poulsen. Trajner: Julian Nagelsman.
PSG: Riko; Bernat, Kimpembe, Silva, Kehrer; Paredes, Markinjos, Herrera; Nejmar, Mbape, Di Maria. Trajner: Tomas Tuhel.